Unsa man ning mga component sa rate?
Ngano man daghan ang charges?

 

Mao kini ang mga component o parte sa atong taripa nga gi-aprubahan sa Energy Regulatory Commission (ERC):

Generation charge (passed through)

Kini ang kantidad sa kuryente nga atong gipalit gikan sa mga power generators. Sa kasamtangan, nagkuha ang SURSECO II ug kuryente niini nga power generators:

Ang hydroelectric power plants sa Agus (sa Marawi City, Lanao del Sur) ug Pulangui (sa Maramag, Bukidnon) nga gipanag-iyahan sa NPC-PSALM Corp.;

Ang coal fired electric power plants sa Fil-invest Development Corporation, sa San Miguel Consolidated Power Corporation, ug sa Aboitiz Power/Therma South, Inc.; ug

Bunker fuel fired electric power plant nga King Energy Generation, Inc. sa Tandag City, Surigao del Sur

Ang kantidad sa lain-laing klaseng tinubdan (hydro, coal ug bunker fuel) dili pareho. Mao nga ang kantidad sa generation charge gitawag nga blended rate o gisagol nga kantidad subay sa ilang gisuplay ug gikonsumo sa atong kooperatiba. Apan subay sa EPIRA, kini nga charge gipakunhuran og 30 centavos (.30Ȼ) matag kWh used nga mogawas isip Power Act Reduction sa inyong bill.

 

Transmission charge (passed through)

Kini ang kantidad sa pagbyahe sa kuryente nga atong gipalit gikan sa mga power suppliers o generators. Ang kantidad niini sa matag kWh naga-base sa gidaghanon sa kuryente nga atong gipalit sa generators ug sa kalayo sa pag-byahe niini. Kini nga kantidad ibayad ngadto sa National Grid Corporation of the Philippines (NGCP).

 

System Loss Charge

Kini mao ang kantidad sa nawala o nausik nga kuryente tungod sa technical ug non-technical nga hinungdan samtang nagbyahe kini gikan sa power suppliers o generators.

 

Distribution, Supply & Metering Charges (DSM)

Kini lamang nga kantidad ang mopaingon sa usa ka electric utility o kooperatiba sa elektrisidad.

Ang distribution charge mao ang kantidad alang sa pagdumala ug pagmentena sa mga pasilidad sa kooperatiba (sama sa distribution lines, lateral lines, distribution transformers, mga poste, overhead ug service drop wires, ug uban pang materyales) aron moabot ang kuryente sa matag panimalay.

Ang supply charge mao ang kantidad alang sa support infrastructures ug equipments sama sa mga maintenance vehicles, opisina ug mga kahimanan ug materyales nga naa sulod niini.

Ang metering charge mao ang kantidad alang sa pagpalit og mga instrument transformers, kWh meters ug lain-laing kahimanan ug materyales ug alang sa mga aktibidad nga adunay kalambigitan sa metrohan ug sa pagmentenar niini.

Anaa usab sa DSM charges ang mga suholan ug benipisyo sa mga empleyado sa usa ka electric utility.

Ang Reinvestment Fund for Sustainable Capital Expenditures (CAPEX)

Mao kini ang gigahin nga pundo alang sa maintenance ug upgrading sa mga dagkung imprastruktura sama sa power sub-station ug back bone lines. Ang atong CAPEX nagkantidad lamang sa kwarenta centavos (0.40Ȼ) matag kilowatt-hour subay sa gi-aprubahan sa Energy Regulatory Commission (ERC).

 

Ang Universal charges

Kini ang mandatory nga kabahinan/balayranan sa matag electric utility o kooperatiba sa kuryente ngadto sa gobyerno alang sa mosunod:

Kontribusyon sa tanang electric utility aron mabayran ang mga napundo nga utang ug mga kontrata sa National Power Corporation (NPC);

Missionary electrification aron matabangan sa pagpasuga ang mga small power utility group (SPUG); ug

Environmental charge para sa pagpalambo sa renewable energy sa nasud o Renewable Energy Development, alang sa environmental share ilabi na sa pagmentena sa mga water shed, ug allowance alang sa renewable energy generators aron dili kaayo sila negatibo nga maapektuhan sa pagsaka-kanaug sa taripa.

 

Uban pang charges

Subay sa gitakda sa balaod, ang mga kabus nga mga konsumante lakip na ang mga kabus nga senior citizen maka-angkon og diskwento sa ilang balayranan sa kuryente.

Ang tanang konsumante nga mokonsumo lamang og 20 kilowatt-hour paubos sa tibuok bulan makaangkon og diskwento depende sa kilowatt-hour nga iyang naggamit. Gitawag kini nga diskwento alang sa mga lifeline users. Apan ang diskwento nga gihatag sa lifeline users baydan o akuhon sa mga konsumante nga dili lifeline users.

Ang senior citizens nga nagpa-rehistro sa ilang account alang sa senior citizen discount, ug kung sila nagkonsumo lamang ug 100 kilowatt-hour paubos sa tibuok bulan, makaangkon og diskwento subay sa iyang makonsumo. Apan ang diskwento nga gihatag sa senior citizens baydan o akuhon sa uban nga mga konsumante.

 

Ang mga buhis

Sama sa tanang electric utilities, ang SURSECO II, subay sa gimando sa balaod, dili makalikay sa mga buluhisan. Ang tanang mga serbisyo niini lakip na ang buhis sa gipalit nga kuryente gikan sa mga generation companies, pagdala sa maong kuryente padulong sa atong sub-station (transmission) ug pag-apod-apod niini ngadto sa mga konsumante, tanan anaay Value Added Tax (VAT).

Ang mga local taxes (sama sa franchise tax, business tax ug real property tax) nga sukton sa mga local government units (LGUs) isulod gihapon isip kabahin sa atong taripa.