Nganong mag Brownout?

 

Adunay duha ka-klase sa brownout o pagkapalong sa suga.

Una, mao ang gitawag nga emergency o un-scheduled nga brownout. Tungod kay emergency man ang pagkapalong, makahatag lamang ang SURSECO II sa detalye sa brownout human nga mahibaloan ang tinood nga hinungdan niini. Kasagaran nga hinungdan mao ang mga mosunod:

  1. Mga tanom (kahoy, kawayan, lubi, etc.), mga istruktura, bisan unsa nga butang o kaha mga mananap nga mobad-ay o motandog sa linya;

  2. Aksidenteng pagkabali sa mga poste o pagkaguba sa mga pasilidad tungod sa nagkalain-laing rason.

  3. Mga kalamidad sama sa bagyo, baha, sunog, kilat ug linog hinungdan nga madaot o maguba ang linya o mga pasilidad sa kuryente.

  4. Kung adunay emergency nga nahitabo sa planta sa power generation companies.

  5. Kung adunay emergency nga pagkadaot sa linya sa transmission company (National Grid Corporation of the Philippines o NGCP)

Ang ikaduha nga klase sa brownout mao ang scheduled o planado nga pagpalong. Kasagaran nga hinungdan niini mao ang mosunod:

  1. Naay himoon nga pagmintinar sa atong mga pasilidad sa kuryente sama sa linya o sub-station

  2. Maghimo og rehabilitasyon o pag-upgrade sa atong mga poste, transformers o uban pang mga kagamitan;

  3. Paghimo og engineering activities ug pagmintinar sa linya, kagamitan ug pasilidad sa transmission company o NGCP.

  4. Paghimo og engineering activities ug pagmintinar sa planta, kagamitan ug pasilidad sa generation companies nga tinubdan sa kuryente.

Alang sa scheduled o planado nga pagpalong, ang buhatan sa SURSECO II nagapadala ug sulat-pahibalo sulod sa 3 o 4 ka-adlaw sa dili pa mahitabo ang scheduled o planado nga pagpalong o brownout sa tanang istasyon sa radio ug cable TV (aron masibya nila ang impormasyon sa katawhan), sa opisina sa mayor sa apektado nga munisipyo, ug sa Board of Director sa apektado nga distrito (aron makatabang sila sa pagpahibalo sa mga lumulupyo).

 

Nagapahibalo usab ang SURSECO II gamit ang TEXT POWER, pinaagi sa social media page ug sa website.